Вёска Буйнавіцкага сельсавета, у складзе камунальнага сельскагаспадарчага прадпрыемства "Буйнавічы". Размешчана за 28 км на паўночны ўсход ад раённага цэнтра, за 40 км ад чыгуначнай станцыі Ельск. Вядома з пачатку XX ст. як хутар Буйнавіцкай воласці Мазырскага павета, 13 двароў, каля 80 жыхароў. Згодна перапісу 1917 г. 25 двароў, 128 жыхароў (з іх 17 беларусаў, 111 украінцаў). У 1923 г. адкрыта працоўная школа 1-й ступені, у якой вучылася 44 дзіцяці. Настаўнікам працаваў М. В. Маслоўскі. На пачатку 1930-х гг. створаны калгас "2-я пяцігодка", працавала кузня. Напярэдадні Вялікай Айчыннай вайны вёска, 110 двароў, 371 жыхар. У ліпені 1943 г. нямецка-фашысцкія захопнікі спалілі ўсю вёску і загубілі 34 жыхароў. У 1998 г. 66 двароў, 111 жыхароў. Магазін. На 1.1.2001 г. 56 двароў, 94 жыхары.
