Вёска Ударнянскага сельсавета, у складзе камунальнага сельскагаспадарчага прадпрыемства "Ударны". Размешчана за 24 км на поўнач ад раённага цэнтра Лельчыцы. Па пісьмовых крыніцах вядома з пачатку XX ст. як хутар Буйнавіцкай воласці Мазырскага павета, 21 двор, 125 жыхароў. Згодна перапісу 1917 г. хутар, 32 двары, 199 жыхароў. У 1923 г. 208 жыхароў. У 1940 г. вёска, 48 двароў, 223 жыхары. У раёне вёскі дзейнічалі супраць акупантаў партызаны Лельчыцкай брыгады. У ліпені 1943 г. нямецка-фашысцкія захопнікі спалілі ўсю вёску і загубілі 9 жыхароў. У 1998 г. 37 двароў, 75 жыхароў. Магазін. На 1.1.2001 г. 33 двары, 59 жыхароў.
